Frosti Sigurjónsson

Frosti Sigurjónsson

  • Hvers vegna gera sum fyrirtæki á evrusvæðinu upp í annarri mynt en evru?

    Hvers vegna gera sum fyrirtæki á evrusvæðinu upp í annarri mynt en evru?

    Sum Íslensk fyrirtæki halda bókhald í annarri mynt en krónu, oft USD eða EUR. Það sama á við á um fyrirtæki á evrusvæðinu sum þeirra gera upp í USD eða öðrum gjaldmiðlum en evru.

    Fyrirtækjum á evrusvæðinu er ekki skylt að nota evru í fjárhagslegri skýrslugerð sinni. Fyrirtæki getur ákveðið hver sé virkur gjaldmiðill þess (functional currency) — það er sá gjaldmiðill sem endurspeglar best hið aðal efnahagsumhverfi fyrirtækisins. Við það mat er meðal annars horft til þess hvaða gjaldmiðill hefur mest áhrif á söluverð, kostnað, laun, fjármögnun og sjóðstreymi.

    Kynningar- eða skýrslugjaldmiðill (presentation currency) getur síðan verið annar en virki gjaldmiðillinn, til dæmis í samstæðureikningum eða gagnvart fjárfestum.

    (meira…)
  • Rætt var um Bókina um ESB í hlaðvarpinu Brotkast

    Rætt var um Bókina um ESB í hlaðvarpinu Brotkast

    Frosti Logason bauð mér í hlaðvarpið til að ræða Bókina um ESB. Við ræddum meðal annars um fyrirhugaða þjóðaratkvæðagreiðslu, efnahagsmál Evrópusambandsins og Íslands. Vexti og gjaldmiðlamál. Hægt er að hlusta á bút úr þættinum á Youtube eða á Spotify.

  • Geta evruríki gengið úr ESB?

    Geta evruríki gengið úr ESB?

    Engin ákvæði um útgöngu úr myntbandalaginu

    Upptaka evru er eitt af skilyrðum aðildar að Evrópusambandinu. Í sáttmálum sambandsins eru ítarleg ákvæði um hvernig aðildarríki skuli undirbúa inngöngu í myntbandalagið. Þau þurfa að uppfylla vel útfærð skilyrði.

    En það er hvergi gert ráð fyrir þeim möguleika að ríki geti hætt með evru. Skilmálarnir innihalda engin ákvæði um hvernig ríki geti gengið út úr myntbandalaginu á öruggan hátt.

    (meira…)
  • Umsögn um tillögu utanríkisráðherra um þjóðaratkvæðagreiðslu um framhald aðildarviðræðna

    Umsögn um tillögu utanríkisráðherra um þjóðaratkvæðagreiðslu um framhald aðildarviðræðna

    Til utanríkismálanefndar Alþingis
    umsagnir@althingi.is

    7. apríl 2026

    Umsögn um tillögu utanríkisráðherra til þingsályktunar um þjóðaratkvæðagreiðslu um framhald viðræðna um aðild Íslands að Evrópusambandinu. Mál 516 á 157. löggjafarþingi.

    Undirritaður mælir gegn tillögunni. Byggir sú afstaða einkum á því að tímasetning fyrir­­­­­­hugaðrar þjóðaratkvæðagreiðslu veitir Alþingi, umsagnaraðilum og kjósendum óeðlilega skamman tíma til að fjalla um svo flókið og umdeilt mál, auk þess sem megnið af umræðutímanum fellur á sumarmánuðina. Þá er orðalag spurningarinnar talið villandi þar sem ekki er raunhæft að „halda áfram“ viðræðum, heldur myndi þurfa að hefja aðildarferli að verulegu leyti frá grunni. Einnig er bent á að aðstæður hafi tekið miklum breytingum frá því viðræður stóðu síðast, að núverandi ríkisstjórn sé ekki bundin þeim fyrirvörum sem Alþingi setti árið 2009 og að lítið pólitískt umboð sé til að hefja aðildarviðræður. Með hliðsjón af skorti á meirihlutastuðningi, óvissu um mögulegar undanþágur frá regluverki ESB og þeim áhrifum sem aðild gæti haft á fullveldi og hagsmuni Íslands, er talið óraunhæft og óheppilegt að setja slíkt ferli af stað. Niðurstaðan er sú að fresta beri málinu eða fella það, þannig að tryggt sé að bæði Alþingi og kjósendur fái nægt ráðrúm og skýrar forsendur áður en tekin er ákvörðun um jafn umfangsmikið álitaefni.

    (meira…)

  • Bókin um ESB – hvað er í pakkanum?

    Bókin um ESB er skrifuð af því tilefni að Íslendingar gætu fljótlega þurft að taka af­stöðu til þess hvort innganga í Evrópusambandið sé skynsamleg.

    Þetta er ekki bók um kosti og galla aðildar Íslands að ESB, heldur gefur hún greinargóða lýsingu á uppbyggingu sambandsins, stjórn­kerfi þess og þróun til dagsins í dag. Sérstaklega er fjallað um eigin­leika tolla­banda­lags ESB, stefnu þess í landbúnaðar- ogsjávarútvegsmálum og einnig um utanríkismál ESB og myntbanda­lag evrunnar.

    Áföll eins og fjármálahrun, Brexit, flóttamannavandi og heims­faraldur, sýna styrkleika og veikleika sambandsins og bókin rekur hvernig ESB gekk að vinna úr þeim.

    Í byrjun árs 2026 glímdi Evrópusambandið við stór vandamál sem tekin eru til skoðunar í bókinni, svo sem vaxandi lýðræðishalla, öldrun, versn­andi skulda­stöðu, ófjármagnaða lífeyrissjóði, stríð í Úkraínu, hátt orku­verð og ef­na­hags­samdrátt. Á sama tíma hefur fylgispekt aðildar­ríkjanna við stefnu og ýmsar ákvarðanir ESB minnkað.  

    Evrópusambandið er nú á krossgötum. Leiðtogar sumra aðildarríkja og æðstu embættismenn ESB segja nauð­syn­legt að ESB verði að sam­bands­ríki og herveldi til að ráða við aðsteðjandi vandamál og treysta stöðuna í sam­keppni stór­velda í framtíðinni.

    Þessi bók er skrifuð fyrir þá sem vilja skilja betur hvernig ESB starfar og hverjar áskoranir þess eru í dag, einskonar rýniskýrsla og skyldu­lesning fyrir þá sem vilja vita „hvað er í pakkanum“.

    Hér er hægt að kaupa Bókina um ESB.

  • Hitamál rædd í Dagmálum Morgunblaðsins

    Eggert Skúlason bauð mér til sín í Dagmál til að ræða bókina Hitamál. Viðtalið í heild sinni er aðgengilegt áskrifendum (hlekkur á viðtalið) og hér er hlekkur á umfjöllun á mbl.is þar sem horfa má á bút úr viðtalinu.

    Margt var rætt og ég sagði meðal annars:

    „Við erum í bandalagi með þjóðum sem eru bara ábyrgar fyrir fimmtán prósent af losun mannkynsins, sem hefur ákveðið að setja sér mjög harðar reglur og refsa sér ef þau ná þeim ekki. Allar hinar þjóðirnar sem eru í þessum Parísarsáttmála koma bara með yfirlýsingar. Viljayfirlýsingar um það sem þau myndu vilja gera. Skila skýrslum og ef þau geta það ekki þá segja þau bara sorrý. Gengur betur næst. Engin sekt.“

    „Þessi vísindi eru ekki nægilega vel unnin til að ætla að banna fólki að keyra bensínbíl eða að ætla að láta Icelandair borga tuttugu milljarða í loftslagsgjöld.“

    „Þetta er á leiðinni út í skurð. Við verðum að átta okkur á því að við ráðum ekkert við þetta, ef þetta heldur óbreytt áfram. Við verðum að gera eitthvað. Við verðum að segja stopp.“

  • Hitamál fá hlýjar viðtökur

    Bókin Hitamál kom loksins úr prentun 4. desember og síðan hefur hún rokið út. Fyrsta prentun kláraðist á nokkrum dögum en fólkið hjá Litlaprent brást skjótt við og prentaði meira.

    Bókin fæst keypt hér á vefnum sem kilja, rafbók og hljóðbók og fyrir stuttu kom hún í bókaverslanir Pennin Eymundsson á höfuðborgarsvæðinu.

    Margir hafa haft samband til að hrósa bókinni og færa þakkir fyrir að koma þeim sjónarmiðum á framfæri sem í henni eru. Morgunblaðið minntist á bókina á forsíðu þann 8. desember sl. en í því blaði var viðtal við mig um efnið. Þann 10. var rætt um bókina í ritstjórnargrein:

    Screenshot

  • Frostarnir spjalla um hlýnun

    Var gestur Frosta Logasonar í Spjallinu á Brotkasti 30. október 2025. Við ræddum um loftslagsmálin, stefnu stjórnvalda í þeim málum og hvað mætti betur fara. Margt af því er hægt að lesa nánar um í bókinni Hitamál.
    Nú er hægt að hlusta á þáttinn í heild sinni á Youtube, eða á Spotify, með því að nota spilarann hér fyrir neðan.

  • Hitamál rædd á útvarpi Sögu

    Var gestur Síðdegisútvarpsins á Útvarpi Sögu þar sem við Pétur Gunnlaugsson ræddum um bókina Hitamál, stefnu Íslands í loftslagsmálum, afleiðingar hennar og margt fleira þessu tengt.

    Það er hægt að hlusta á þáttinn hér fyrir neðan.

  • Hitamál – Glóðvolg bók um loftslagsmálin

    Hitamál - kápumynd

    Loftslagsmálin hafa á örfáum árum orðið eitt stærsta viðfangsefni samfélagsins. Stefnan á kolefnishlutleysi kallar á sífellt umfangsmeiri og kostnaðarsamari aðgerðir í trausti þess að vísindin séu hafin yfir vafa.

    Það er staðreynd að jörðin hefur hlýnað og að koltvísýringur hefur aukist. En vísindamenn eru ekki sammála um hversu stór hluti hlýnunarinnar skýrist af náttúrulegum sveiflum, losun manna eða samspili beggja. Loftslag jarðar er flókið kerfi þar sem margir þættir verka saman þar á meðal skýjahula, hafstraumar, mengun og sólvirkni. Koltvísýringur skiptir máli, en er aðeins einn þáttur af mörgum.

    Hitamál fjallar um þetta og sögu loftslagsbreytinga, óvissu í mælingum, spár sem hafa brugðist, vafasöm úrræði til að draga úr losun og aukaverkanir íþyngjandi regluverks. Bókin byggir á fjölda rannsókna og heimilda og dregur fram gögn sem vekja spurningar.

    Hitamál er bók fyrir þá sem vilja íhuga hvort núverandi stefna í loftslagsmálum sé raunhæf eða hvort kominn sé tími til að huga að öðrum leiðum.

    Bókin er í prentun og verður tilbúin til afhendingar 1. desember og á sérstöku tilboði í forsölu. Rafbókin er tilbúin og til afhendingar strax.

    Smelltu hér til að fara í Bókabúð FS og panta eða kaupa.