Birt þann eftir Frosti Sigurjónsson

Hvernig stöðvuðu Indverjar stóru bylgjuna?

Um mánaðarmótin apríl-maí flutti RÚV átakanlegar fréttir frá Indlandi. Neyðarástand ríkti vegna faraldursins, sjúkrahús og útfararstofur höfðu ekki undan. Þann 10. maí greindust 400 þúsund smit á einum degi.

Indverjum tókst samt með markvissum aðgerðum að ná tökum á faraldrinum og eftir mánuð hafði smittíðni lækkað um 75%. Mánuði síðar greindust 40 þúsund smit á dag, fækkun um 90%. Síðan hefur smitum haldið áfram að fækka jafnt og þétt í Indlandi og greinast nú færri en 10 smit á hverja milljón íbúa.[1] 

Indland: ný smit, 7 daga meðaltal. Í byrjun maí var ivermectin tekið í notkun.

Nú geysar faraldurinn sem aldrei fyrr á Íslandi. Þegar þetta er skrifað greindust hér 200 smit á einum degi en aðeins 14 smit hjá 240 milljón íbúum indverska fylkisins Uttar Pradesh. Getum við mögulega lært eitthvað af þessum frábæra árangri Indverja?

Ísland. Ný smit, 7 daga meðaltal.
Leiðbeiningar indverska heilbrigðisráðuneytisins

Í maí höfðu Indverjar ekki bóluefni til að kveða niður bylgjuna, auk þess sem aðstæður þar voru á margan hátt miklu erfiðari en hér. Þeir þurftu því að grípa til töluvert harðari samfélagslegra takmarkana en við höfum vanist, en auk þess gaf indverska heilbrigðis- og velferðaráðuneytið út leiðbeiningar um að þeir sem væru með smit gætu tekið lyfið Ivermectin (magn: 0.2 mg/kg) í 3-5 daga.[2] 

Indland telur 29 fylki. Fámennast þeirra er fylkið Goa með 1.8 milljón íbúa. Þar greindust ríflega fjögur þúsund smit í byrjun maí. Heilbrigðisráðherra fylkisins, Mr. Vishwajit Rane gaf þá út fyrirmæli[3] um að allir eldri en 18 ára fengju Ivermectin (1 stk. 12. mg. tafla) sem fyrirbyggjandi lyf. Þeim sem voru smitaðir var boðið að taka 12 mg af Ivermectin á dag í fimm daga. Á næstu fjórum vikum lækkaði fjöldi daglegra smita í Goa um 90%. Þau voru aðeins 400 þann 11. júní og fóru síðan lækkandi. 

Víða var ivermectin dreift ásamt doxycycline, zinki og vítamínum

Stjórnvöld í Karnataka fylki (61 milljón íbúa) og Uttarakhand fylki (10 milljón íbúa) ákváðu einnig að dreifa Ivermectin til allra íbúa[4]. Í þessum fylkjum lækkaði tíðni smita um 90% á næstu fjórum vikum.[1] 

Alþjóðaheilbrigðisstofnunin (WHO) hefur mælt gegn notkun Ivermectin gegn Covid-19, á þeim grunni að ekki sé enn nægilega sannað að lyfið gagnist gegn sjúkdómnum. Stjórnvöld í Kerala (34 milljónir íbúa) og Tamil Nadu (72 milljónir íbúa) ákváðu því að dreifa ekki ivermectin töflum til íbúa.  [5][6] Þessum tveim fylkjum hefur gengið illa að draga úr faraldrinum og smittíðnin þar er mun hærri en í Goa, Karnataka og Uttarakhand.

Kerala fylki á Indlandi: Ný smit, 7 daga meðaltal. (Notuðu ekki ivermectin)

Svo virðist sem þeim fylkjum sem notuðu ivermectin, hafi gengið öðrum betur að draga úr smitum og veikindum. Fleira gæti vissulega ráðið árangrinum, en hann rímar sterklega við þær fjölmörgu rannsóknir á ivermectin sem bent hafa til þess að lyfið fækki smitum, mildi einkenni og dragi verulega úr hættu á innlögnum og andlátum vegna Covid-19. Rannsóknir hafa einnig sýnt að ivermectin skilar sjúklingum betri árangri því fyrr sem það er notað.[7]

Uttar Pradesh fylki á Indlandi: Ný smit, 7 daga meðaltal. (Notuðu ivermectin)

Þess má geta að ivermectin hefur í tugi ára verið í flokki með virkustu og öruggustu lyfjum sem þekkjast. Einkaleyfi Merck á lyfinu rann út fyrir mörgum árum. Hver skammtur kostar innan við 10 kr í framleiðslu og framboðið er nægt. 

Það er erfitt að sjá hvað gæti tapast við að nota ivermectin hér en ávinningurinn gæti hinsvegar verið gríðarlegur.  Okkur liggur á að kveða niður faraldurinn eins hratt og mögulegt er; heilsa, líf, athafnafrelsi og efnahagur landsins er í húfi. Því er fullt tilefni til að beita öllum þeim meðulum sem mögulega geta komið að gagni í baráttu við faraldurinn og valda ekki skaða.

Heimildir: